ఆనంద్ సాయి కొడుకు కేసులో బిగ్ ట్విస్ట్.. బెయిల్ వచ్చాక గంజాయి వీడియో కలకలం!

ప్రముఖ సినీ ఆర్ట్ డైరెక్టర్ ఆనంద్ సాయి కుమారుడు సందీప్ హిట్ అండ్ రన్ కేసు అనూహ్య మలుపు తిరిగింది. ఒకరి మృతికి కారణమైన ఈ కేసులో నిందితుడిగా ఉన్న సందీప్‌కు బెయిల్ లభించిన కొన్ని గంటల్లోనే, అతడు గంజాయి తాగుతున్నట్టుగా ఉన్న ఒక వీడియో సోషల్ మీడియాలో వైరల్ కావడం సంచలనం సృష్టిస్తోంది. ఈ కొత్త పరిణామంతో పోలీసులు దర్యాప్తును మరో కోణంలో వేగవంతం చేశారు.

ఈ నెల 1న రాయదుర్గం పోలీస్ స్టేషన్ పరిధిలో జరిగిన రోడ్డు ప్రమాదంలో వేగంగా కారు నడిపి ఒకరి మరణానికి సందీప్ కారణమయ్యాడని పోలీసులు కేసు నమోదు చేశారు. ప్రమాదం జరిగిన తర్వాత కారు ఆపకుండా వెళ్లిపోవడంతో (హిట్ అండ్ రన్) అతడిపై పలు సెక్షన్లతో పాటు మోటార్ వెహికల్ యాక్ట్ కింద కేసు నమోదు చేసి అరెస్ట్ చేశారు. అయితే, ప్రమాద సమయంలో సందీప్ మద్యం తాగలేదని, యూరిన్ డ్రగ్స్ స్క్రీనింగ్‌లో కూడా నెగటివ్ అని తేలడంతో ప్రాథమికంగా ఊరట లభించింది.

ఈ క్రమంలోనే మంగళవారం రాత్రి 11 గంటల సమయంలో పోలీసులు సందీప్‌ను న్యాయమూర్తి ఎదుట హాజరుపరచగా, అతడికి బెయిల్ మంజూరైంది. అయితే, సందీప్ గంజాయి పీలుస్తున్నట్లు ఉన్న ఒక పాత వీడియో బుధవారం సామాజిక మాధ్యమాల్లో చక్కర్లు కొట్టింది. ఈ వీడియో తమ దృష్టికి వచ్చిందని, దానిపై కూడా విచారణ జరుపుతున్నామని రాయదుర్గం ఇన్‌స్పెక్టర్ భూపతి తెలిపారు.

ఈ వీడియో నేపథ్యంలో సందీప్ రక్త నమూనాలను సేకరించి, ఫోరెన్సిక్ సైన్స్ లాబొరేటరీకి పంపినట్లు ఆయన వెల్లడించారు. ఈ అధునాతన పరీక్ష ద్వారా కొన్ని నెలల క్రితం మాదకద్రవ్యాలు తీసుకున్నా కూడా కచ్చితంగా గుర్తించవచ్చని ఇన్‌స్పెక్టర్ వివరించారు. వీడియో పాతదే అయినప్పటికీ, డ్రగ్స్ వినియోగానికి సంబంధించిన ఆరోపణలపై లోతుగా దర్యాప్తు చేస్తున్నట్లు పోలీసులు స్పష్టం చేశారు.